ठाणे (प्रतिनिधी ) : सोमवार दिनांक 14/11/2022 रोजी संध्याकाळच्या सुमारास भटवाडी, श्रीनगर पोलीस ठाण्याच्या परिसरात खासदार राजन विचारे यांच्यासोबत बाहेरुन आलेल्या समर्थकांनी आमच्या पक्षाचे माजी नगरसेवक योगेश जानकर आणि त्यांच्या कार्यकर्त्यांसोबत विभागात असलेल्या वाढदिवसाच्या कार्यक्रमात बाचाबाची, शिविगाळ तसेच त्यांच्यासोबत असलेल्या कार्यकर्त्यांना धक्काबुक्की करुन मारहाण केली असल्याचा आरोप नरेश म्हस्के यांनी केला आहे. त्याचप्रमाणे श्रीनगरमध्ये झालेल्या लाठीचार्ज प्रकरणची चौकशी करण्याची मागणी यावेळी म्हसके यांनी केली आहे. यासंदर्भात एक निवेदन शिंदे गटाकडून देण्यात आले
आहे./ खासदार राजन विचारे, संजय घाडीगांवकर यांच्यासोबत बाहेरुन आलेल्या समर्थकांनी मुख्यमंत्री एकनाथ शिंदे यांच्याविरोधात घोषणाबाजी केली, अश्लील भाषेचा वापर करुन घोषणा दिल्या, मुख्यमंत्री यांच्या विरोधात अश्लील भाषेत घोषणाबाजी केल्यामुळे याचा जाब विचारण्याकरिता विभागातील हजारो नागरिक श्रीनगर पोलीस स्टेशन येथे दाखल झाले. यावेळी खासदार राजन विचारे यांच्यासोबत विभागाच्या बाहेरील 40 ते 50 त्यांचे समर्थक बसलेले होते, आणि त्याचवेळी त्यांच्यासोबत असलेल्या काही महिला व पुरूषांनी सोशल मिडीयावर मुख्यमंत्री आणि महाराष्ट्र शासनाच्या विरोधात अश्लील भाषेत पोस्ट टाकल्या, यामुळे याबाबत तक्रार दाखल करण्याकरिता आलेल्या नागरिकांमध्ये संतापाचे वातावरण निर्माण होवून जमाव आक्रमक होवू लागला,
ज्यावेळी खा. राजन विचारे आणि त्यांचे समर्थक पोलीस स्टेशनमधून बाहेर जाताना जमावाने घोषणाबाजी केली. याला कारण त्यांच्या समर्थकांनी जमावाला उचकावण्याचे प्रयत्न हेच होते. त्याक्षणी श्रीनगर पोलीस स्टेशनच्या आवारात पोलीसांनी लाठ्यांनी तसेच लाकडी बॅटने लोकांना मारण्यास सुरूवात केली. पोलीसांना आम्ही अडवत असताना सुद्धा पोलीस काहीही ऐकण्याच्या मनस्थितीत नव्हते. त्यांचा लाठीमार सुरूच होता. कित्येक जणांचे या लाठीमारामध्ये डोकी फुटली असून मुका मार लागलेला आहे. पोलीसांच्या कृतीतून कोणा एका गटाची बाजू घेवून लाठीमार केला असल्याचे दिसून येते. या पोलीसांसमवेत काही पोलीस नसलेली माणसे सुद्धा पोलीस म्हणून जमावावर लाठीमार करीत होते.
जमावाला आम्ही स्वत: समजविले, नाहीतर प्रचंड मोठ्या प्रमाणात गंभीर परिस्थ‍िती निर्माण झाली असती. तरी सदर लाठीमाराची चौकशी करुन संबंधितांवर कारवाई करावी अशी मागणी नरेश म्हस्के यांनी यावेळी केली आहे.
